හැඳින්වීම

අසමි දකිමි සොයමි වර්ඩ්ප්‍රෙස් බ්ලොග් අඩවියට සමගාමීව ප්‍රකාශයට පත්කෙරේ

28 October 2014

කරන්න දෙයක් නෑ මම ප්ලෑන් කරලා වැඩේ දෙනවා (තුන්වැනි කොටස) – Battle Appreciation and Plan (Part Three)

lineofduty200904112
 අනේ මන්දා, මම මේ ලිපි පෙළ ලියන්න පටන් අරං තියෙන්නේ, මොකක්දෝ මහා අපල ග්‍රහචාරයක් තියන වේලාවකද කියලා හිතෙනවා. මේ ලිපියේ පළමුවැනි කොටසේදී මම කිව්වනේ, ලිපිය ලියන්න පටන්ගත්තේ 2013 වර්ෂයේදී කියලා.


   ඉතිං බලන්න, පළමුවැනි කොටස පළකර ගන්නම කොච්චර කාලයක් ගියාද. ඊළඟ දෙවැනි කොටස පළකරන්න ලැස්ති වෙනකොටම, වෙනත් වැදගත් මාතෘකා දෙකක් ඔලුවට ආව නිසා, ඒ ගැන ලිපි දෙකක් ලියන්න සිද්දවුනා. ඊළඟට මේ ඊයේ පෙරේදා, ලැජ්ජා නැති පුඟුලෙක්, මගේ ලිපියක් හොරකම් කරලා තිබුණා. ඒ ගැනත් ලියන්න සිද්දවුණා. ඒ නිසා තමයි මම කිව්වේ, මේ ලිපි මාලාව ලියන්න පටන් අරං තියෙන්නේ, මොකක්දෝ මහ අපල ග්‍රහචාරයක් පවතින වෙලාවකයි කියලා.

   හරි හරි, ඔන්න තුන්වැනි කොටස පටන්ගන්නයි හදන්නේ. කලින් කොටස් දෙක මතක නැතුවනම්, මේ කොටස බලලා වැඩක් නැහැ. ඒ නිසා ලිපිය කියවන්න කලින්,



කියවලා ආවොත් හොඳයි. නැත්නම් මොකවත් වැටහෙන්නේ නැතිවෙයි. වෙන දේවල් වගේ නෙවෙයිනේ. ඔබෙන් බොහෝ දෙනෙකු මීට කළින් අහලා නැති කරුණු තමයි මේ ලිපි මාලාවේ අඩංගු වෙන්නේ. එමෙන්ම මා දන්නා තරමින් මේ කරුණු සිංහල භාෂාවෙන් මෙසේ ලියා ඇති වෙනත් තැනක් නැහැ.

හොඳයි, අපි දැන් කරුණු අධ්‍යයනය කරමින් සිටින්නේ, 'කෙල්ල ඉස්සීමේ මෙහෙයුම හෙවත් - Operation Girl Lift' ක්‍රියාන්විතය කොයි මොහොතේ හෝ දියත් කරන්නයි. ඒ සඳහා න්‍යායාත්මකව කෙරෙන කරුණු අධ්‍යයනයෙදී, පසුගිය ලිපියෙන් අපි, අපේ පැත්ත හෙවත් Own Force ගැන කරුණු සලකා බැලීම අවසන් කළා. අද අපි කරන්නේ, සතුරු පක්‍ෂය හෙවත් Enemy Force ගැන කරුණු අධ්‍යයනය කිරීමයි. මෙහෙම හිතලා බලන්න. ඔන්න දැන් කෙල්ල උස්සන්න යන්න ලෑස්ති වෙලා, අපි බලනවනේ, මට යාළුවො කීදෙනෙක් ඉන්නවද, උන්ට කරන්න පුළුවන් දේවල් බැරි දේවල් මොනවද, ආයුධ වශයෙන්, අඩු ගණනේ, පොලු කෙටි දෙකතුනක් වත්, අපි අතේ තියනවද, මොනවද තියන වාහන, යන්නේ කොහොමද, විකල්ප ක්‍රියාමාර්ග මොනවද. ඔන්න ඔවනේ අපි මෙතෙක් දවස් කතාකළේ. ඒ විතරක් මදි. සතුරා මොනවගේද කියලා, හැකිතරම් සවිස්තරාත්මකව අධ්‍යයනය කළේ නැත්නම්, අපේ පරාජය ස්ථිරයි. ඒ නිසා, සතුරා ගැන අපේ දැනීම, හැකි තරම් ඉහළ මට්ටමක තිබිය යුතුයි. මෙන්න මේවා තමයි අපි සතුරා ගැන දැනගතයුතු කරුණු. 


know thy enemyසතුරා - Enemy 


10. සතුරාගේ ශක්තිය/බලය - Enemy Strength 

   (මොකක්ද මේ 10 ඉලක්කම කියලා දැන් අහන්න එපා. අංක 1 තියෙන්නේ මේ ලිපියේ පළමුවැනි කොටසේ. 9 ඉලක්කමෙන් තමයි දෙවැනි කොටස අවසන් වුණේ) 

   මේ කාරණයේදී මුලින්ම බලන්නේ, සතුරාට කොපමණ පිරිස් බලයක් තිබෙනවාද කියන එකයි. හොඳින් මතක තියාගන්න. අපිට කවදාවත් බැහැ, හරියටම මෙන්න මෙච්චරක් ඉන්නවා කියලා හොයාගන්න. සතුරාටත් බැහැ, අපි ගැන එහෙම හොයාගන්න. ආසන්න වශයෙන් කොපමණද කියන එක තමයි, ගණනය කරන්නේ. අපේ සැළසුම් හදන්නේ, ඒ ගණනය කිරීම් ගැන සෑහීමකට පත්වුණාමයි. එක වරක් දෙවරක් නෙවෙයි, කීපවරක් පරීක්ෂා කර තහවුරු කරගත යුතුයි.

11. සතුරාගේ අවි සහ උපකරණ බලය 
 Enemy Weapons and Equipment

   විශේෂයෙන් විස්තර කරන්න ඕනෙ නැහැනේ. සතුරා පාවිච්චි කරන්නේ මොනවගේ ආයුධ ද, ආධාරක අවි (මෝටාර්, බර මැෂින් තුවක්කු, ආර්.පී.ජී වැනි) තිබෙන්නේ මොනවාද, ආධාරක සේනා (කාලතුවක්කු, මිසයිල්, යුද්ධ ටැංකි) බලය කෙසේද, රේඩාර් වැනි විශේෂ උපකරණ තිබේද, වැනි කරුණු තමයි මෙහිදී සළකා බලන්නේ.  

12. සතුරු බිම් වෙඩි කෙත් තිබේද 
   Enemy Mine Fields

   සතුරා බිම්වෙඩි වළලා තිබුණොත්, අපේ ගමන අවසන් වෙන්නේ, අපේ සෑහෙන පිරිසකගේ පාද අහිමිවීමෙන් හෝ මරණයෙන්. ඒ නිසා අපේ ඔත්තු සේවා, චන්ද්‍රිකා පද්ධති, නිරීක්ෂණ ගුවන් යානා, මගින් හොයාගන්න වෙනවා, බිම්වෙඩි කෙත් තියනවාද කියා. 

13. සතුරාගේ චිත්ත ධෛර්යය සහ හැසිරීම් රටාව 
  Enemy Moral and habits 

  අපි දන්නවනේ, මම බජාර් එකේ චන්ඩියානම්, කාටත් පෙනෙන්න පිහිය/පිස්තොලේ ඉනේ ගහගෙන තමයි, බජාර් එකේ හක්කොලං කොරන්නේ. නමුත්, ගමේ පොලොසියට අලුත් ඕ අයි සී මහත්තැන් කෙනෙක් ඇවිත් ඉන්නවා, ඕනෙම චන්ඩියෙක් පෙරේතයා වගේ උස්සලා පොළොවේ ගහන කියලා ආරංචි වුනොත්, මම ඒ චන්ඩියා විදිහට නෙවෙයි නොන්ඩියා වගේ තමා ඉන්නේ. යුද්ධයේදීත් එහෙමයි. තමන්ගේ පිරිස් බලය, ආයුධ බලය, ආධාරක භට පිරිස් බලය, ආධාරක අවි බලය, බොහොම ඉහළ තත්වයක තිබෙනවානම්, සතුරා තමන්ගේ කඳවුරු වලට වෙලා නිකම් ඉන්නේ නැහැ. ටිකක් ඇවිදලා කූරු ගාලා බලනවා, කොහොම හරි අපිට වැඩක් දෙන්න පුලුවන්ද කියලා. ඒ වගේමයි, මෑත කාලයේදී අපෙන් කාලා ඉන්න සතුරෙක් නම්, වැඩිය සෙල්ලම් දාන්න යන්නේ නැතුව පාඩුවේ ඉන්නවා. කාමිනීලගේ බාප්පා ඇතුළු පිරිස ගැනත් හොයලා දැනගන්න වෙනවා මේ ආකාරයට. 

14. සූදානමින් සිටින/අතිරේක/ආධාරක/ භටපිරිස් යෙදවීමේ ශක්‍යතාව - Reserve/Reinforcement/ Capabilities

   මතකනේ මේ කතාවේ ඉන්න මගේ සතුරු පක්ෂය. ඒ කියන්නේ මගේ පෙම්වතිය වන කාමිණීගේ දෙමාපියන්, ඥාතීන්, මිත්‍රයන්, අසල්වැසියන්, ආදී මහා සතුරු සේනාවක් ඉන්නවනේ. ඉතිං මම කෙලලා ඉස්සීමේ ක්‍රියාන්විතය දියත් කළ වහාම, ඔය සතුරු සේනාව කුමන ආකාරයකින් ක්‍රියාත්මක වෙයිද කියලා හැකිතරම් තොරතුරු සොයාගත යුතුයි. අපි හිතමු මෙහෙම එක නාඩා පිරිසක් ඉන්නවා බොරැල්ලේ. තව පිරිසක් කොට්ටාවේ, තවත් අය කිරුලපනේ. ඔන්න ඔය විදිහට ඒ අය කෙල්ල ඉස්සීමේ ක්‍රියාවට එරෙහිව කොපමණ වෙලාවක් ඇතුළත කොයි පැත්තෙන් ඇවිත්, 'සීන් එකට ඇන්ටර් වෙයිද' කියන එක හරිම වැදගත්. මම උන්ට වැඩක් දෙන විදිහ ගැනත් හිතන්න වෙනවා. 

15. සතුරු පක්ෂයේ සූදානම - Preparedness 

   සතුරු පක්ෂයේ ඉන්නේ බබාලා නෙවෙයිනේ. එයාලා සෑමවිටම සූදානමින් ඉන්න බව මම මුලින්ම දැනගන්න ඕනෙ. හැබැයි ඒ සූදානම මොන වගේද කියලා දැනගන්න පුලුවන්නම් වැඩිය හොඳයි. අපි හිතමු මෙහෙම. මම කෙල්ල උස්සන්න එනවා ඇති කියලා හිතෙන හැම පාරකම ඒගොල්ලෝ ඇම්බුෂ් හෙවත් රැකසිට පහර දීමේ කණ්ඩායම් යොදවන්න පුළුවන්. අපට වෙඩි තියන්න, පිහියෙන් අනින්න, ඇසිඩ් ගහන්න, ගෙදර ඇතුලෙත් කණ්ඩායම් සූදානම් කරලා තිබෙන්න පුළුවන්. ඒ වගේම තමයි එහි අනික් පැත්ත. සතුරාත් මා ගැන හොයනවානේ. මගේ බලපුළුවන්කාරකම් ගැන අහලා සතුරා සමහරවිට ටිකක් බයවෙලා උදාසීන වෙලා ඉන්නත් පුළුවන්. ඒ නිසා සතුරාගේ පෙර සූදානම ගැන දැනගැනීම හරිම වැදගත්. 

16. සතුරා රැඳී සිටින ආකාරය - Disposition 
 
   
මෙයින් අදහස් කරන්නේ සතුරා, තමන්ට අයත් බල ප්‍රදේශයේ ඉන්නේ කුමන ස්ථාන වලද කියන එකයි. දැන් මම උස්සන්න යන කෙල්ලයි, කෙල්ලගෙ අම්මයි තාත්තයි, මල්ලියි, අයියයි, ඉන්නේ කෙල්ලගේ ගෙදර. අල්ලපු ගෙදර ඉන්නවා අර මහා නපුරු, ගණන්කාර, බාප්පා. ඊට ගෙවල් දෙකකට එහා ඉන්නවා ඒ බාප්පාගේ තග් ගැන්සියේ එවුන් දෙන්නෙක්. ඔන්න ඔය විදිහට සතුරා කොයි ආකාරයෙන් කුමන ස්ථානවලද ඉන්නේ කියන එක හරිම වැදගත්. මගේ ප්‍රහාරක සැළැස්ම සකස් කිරීමේදී ඒ ගැන විශේෂයෙන් සිතිය යුතුයි.  

17. සතුරාගේ විශේෂ දක්ෂතා/හැකියා - Special capabilities

   අපි හිතමු සතුරාගේ ගුවන් බලය/කාලතුවක්කු බලය/යුද්ධ ටැංකි බලය/ මෝටාර් බලය/ මිසයිල් බලය/ වැනි සාධක වලින් එකක් හෝ කීපයක් ප්‍රබලව තිබෙනවානම්, එහෙමත් නැත්නම් ආධාරක භට පිරිස් ඉතා සුළු වෙලාවකින් ගෙන්වා ගැනීම වැනි විශේෂ හැකියා තිබෙනවානම්, මගේ කතාවේ හැටියට, කෙල්ලගේ දෙමවුපියන්ට, කෙල්ලවත් අරං මට අහුනොවෙන්න පලායන්න පුළුවන් බව පෙනෙනවානම්, අන්න ඒ වගේ සතුරාගේ විශේෂ හැකියා වලට ප්‍රතිවිරුද්ධව මා කුමක් කළයුතුද යන්න තීරණය කළයුතු වෙනවා. 

18 . සැකසුම් - Deductions 

   ඉහත අංක 10 සිට 17 දක්වා සියලු කරුණු කාරණා සැලකිල්ලට ගැනීමෙන් පසු, මගේ සැලැස්මේ අවශ්‍ය සැකසුම් කිරීමේදී, පහත දැක්වෙන යුධ  න්‍යායාත්මක පිළිවෙත අනුව කටයුතු කළයුතුයි. මෙව්වට පිටින් ගියොත් එහෙම බඩුම තමයි. 
  • අ. ප්‍රහාරක භටපිරිසේ සංයුතිය (කොපාමන භට පිරිසක් යොදවනවද, කාලතුවක්කු, යුද්ධ ටැංකි, ආධාර ලබාගන්නේද)
 
  • ආ. වෙඩි ප්‍රහාර සැළැස්ම (මේ වැඩේ හරි සංකීර්ණයි. කෙටියෙන් මෙහෙම කියන්නම්. වැඩේට බැස්සම ඒ ඒ අවස්ථාවේදී පාවිච්චි කරන්නේ කුමන ආයුධද, කවුද ඒ ඒ කණ්ඩායමේ ඉන්නේ, සතුරු පැත්තෙන් එන වෙඩි වලට ප්‍රති ප්‍රහාරක වෙඩි ලබාදෙන්නේ කවුද, ආදී වශයෙන්)
 
  • ඇ. ඉලක්කය වෙත ළඟාවීම සඳහා හඳුනාගත් මාර්ග අතරින් ප්‍රමුඛතාවය තෝරාගැනීම. 
 
  • ඈ. ප්‍රහාරයේ ඒ ඒ අවස්ථා සඳහා කාල රාමුවක් සැකසීම. (කෙල්ලගේ ගෙට කඩාවැදීම විනාඩි තුනයි, බාධා කරන්නට එන අයට ගහලා බිම දැමීම විනාඩි හතයි, කෙල්ල උසාගෙන එලියට එම විනාඩි දෙකයි ආදී වශයෙන්) 
 
  • ඉ. ප්‍රහාරයේ අරමුණු ප්‍රමඛත්වය සැකසීම (ඉස්සර වෙලාම කෙල්ලගේ ගෙදර ගේට්ටුවෙන් පැනීම, ඊළඟට කෙල්ලව ගෙදර පස්ස දොරෙන් වෙන කවුරුහරි පන්නාගෙන යාම වැලැක්වීම, ඊළඟට කෙල්ලගේ ගෙදර අය යටත් කර ගැනීම, ඊළඟට අපිට ගහන්න එන එවුන්ට වැඩේ දීම, ඊළඟට කෙල්ල අරං එලියට ඊම, ඔන්න ඔය විදිහට මුලින් කලයුත්තේ කුමක්ද දෙවනුව තුන්වනුව කලයුත්තේ කුමක්ද කියා සැළසුම් කළයුතුයි)
 
  • ඊ. අතිරේක/අධාරක භටපිරිස් සූදානම් කිරීම. මගේ ඉන්න පිරිස මදි කියා හිතෙනවානම්, ආධාරයට තවත් යාළුවො අරං යන්න ඕනෙ. උන්ව හොඳ සූදානමකින් හදිස්සියකට ටක් ගාලා අපි ඉන්න තැනට එන්න පුළුවන් විදිහට යාන වාහන සහිතව රඳවා තියන්න ඕනෙ.
 
 19. ද්විපාර්ශ්ව සංසන්දනය Relative Strength 

   මෙතැනදී කරන්නේ මේකයි. සතුරු පක්ෂයේ ශක්තිය සහ අපේ පක්ෂයේ ශක්තිය සංසන්දනය කරනවා. සැලැස්මේම ලියනවා මෙහෙම,

   සතුරාගේ පාබල භටපිරිස් ප්‍රමාණය (මෙච්චරයි) අපේ පාබල භටපිරිස් ප්‍රමාණ (මෙච්චරයි) ඊළඟට යුද්ධ ටැංකි, කාලතුවක්කු, මෝටාර්, ඉංජිනේරු බලය යන කරුණු, ඒ විදිහටම, ප්‍රමාණාත්මකව සංසන්දනය කරනවා.  එතකොට අපිට පැහැදිලි චිත්‍රයක් මැවෙනවා මේක මොනවාගේ සටනක්ද කියන එක.

20. සැකසුම් - Deductions 

   ඔබ මේ ලිපි මාලාව උනන්දුවෙන් කියවාගෙන ආවානම්, මේ රටාව දැන් පැහැදිලි ඇති. තත්ත්ව ඇගයීමක් කළ වහාම ඊට අදාළව සැකසුම් කරනවා. දැන් අපි දෙපැත්තේ ශක්තිය සංසන්දනාත්මකව බැලුවා. අපි හිතමු, මේ කෙල්ල උස්සන වැඩේට, මට ඉන්නේ හත් දෙනයි. කෙල්ලගේ පැත්තේ 13 දෙනෙක් ඉන්නවා කියලා. මොකද කරන්නේ වැඩේ අතාරිනවද. නැහැ. මතකනේ ඔබ SPBR කෙනෙක්. ඒ නිසා සටන අතාරින්නෙ නැහැ. දැන් අපි සැලසුම් කළයුතුයි 7 දෙනෙකුගෙන්, 13 දෙනෙකුට වැඩේ දෙන්නේ කොහොමද කියලා.  ඇත්තටම යුද්ධයේදීත් මෙහෙම වෙනවා. 

හොඳයි අපි ඊළඟ කොටසේදී බලමු, සීමිත භටපිරිසක් යොදාගෙන, මම කොහොමද කෙල්ල උස්සන්නේ කියලා. 


my-signature-for-blog[1]   2014 ඔක්තෝබර් මස 28 වැනි දින 2224 පැය

21 October 2014

බලන්ඩකෝ මෙයාලා දන්න දේවල් - Shame on you Plagiarist

අම්මෝ........... බලන්නකො මෙන්න මෙයාලා දන්න දේවල්. මෙයාලා තමන්ගේ අඩවියේ අලුත් ලිපියක් දාලා, මුලින්ම මෙන්න මෙහෙම කියලා තියනවා.

මෙය අන්තර්ජාලය ඇසුරෙන් උපුටාගැනිමක් වන අතර ලිපියේ රස්ඤතාවයට හානියක් නොකර ලිපිය ඉදිරිපත් කර ඇත​.

   අනේ ද කියන්නේ. ටිකක් උනන්දුවෙන් බලනකොට, මෙන්න බොලේ මේක මගේ පරණ ලිපියක්. මේ තියෙන්නේ මගේ ලිපිය.

   අම්මපා මොකක්ද මේ 'රස්ඤතාවය' කියලා මෙතන කියන්නේ? විස්කිරිඤ්ඤා වගේ දෙයක්ද? හෝ...........හෝ...........දැනුයි තේරුණේ. මුන්නැහෙලා මේ 'රසඥතාවය' කියන වචනේ තමයි ලියන්න උත්සාහ කරලා තියෙන්නේ. 'අන්තර්ජාලය ඇසුරෙන් උපුටා ගැනීමක්' ලු. 

   ඉතිං හත් දෙයියනේ, ගත්තෙ කොහෙන්ද කාගෙන්ද කියලා කියනවලකෝ. මමත් ලිපි ලියන්නේ, අන්තර්ජාලයේ මිසක් අල්ලපු ගෙදර තාප්පයේ නෙවෙයිනේ. මගේ අඩවියෙන් උපුටා ගත්තා කියන්න ඇයි ඔච්චරම ලැජ්ජා? අනික මේ රස්ඤතා අඩවියේ කාටවත් කමෙන්ට් දාන්නවත් බැහැ. ඒත් ලැජ්ජා නැතුව කියනවා ලයික් එකක් දාලා යන්න කියලා.

   උදේ පාන්දරවත් කිව්වනම්, උන්නැහේගේ දෝතම අල්ලන්න කියලා වෙන මොකක් හරි දාන්න තිබුණා. 'රස්නේ පිටින්ම කාලා බලන්න' කියලා. 

 අනේ කාලේ වනේ වාසේ කිව්වලුනේ.


1


මට මතක්වුණා පරණ ජනකවියක්. මෙන්න මෙහෙමයි ඒ කවිය.

ඇතුල් පැත්ත පිටපැත්ත නොදන්නා
කිතුල් පිත්ත උඩ පියවර මැන්නා
උකුල් ඇටෙත් උගේ එලියට පැන්නා
එහෙව් උනුත් අද සබයට එන්නා


Screenshot (61)


Screenshot (62)


අම්මපා මෙව්වා මටමනේ වෙන්නේ :D :D :D 


my-signature-for-blog[1]     2014 ඔක්තෝබර් මස 20 වැනි දින 2327 පැය

18 October 2014

කරන්න දෙයක් නෑ මම ප්ලෑන් කරලා වැඩේ දෙනවා (දෙවැනි කොටස) – Battle Appreciation and Plan (Part Two)

2
  මතකයි නේද මේ කතාවේ පළමුවැනි කොටස? මතක නැත්නම්, මෙන්න මෙතනින් ගිහිල්ලා, කියවලා එන්නකෝ. එහෙම නැතුව මේ කොටස තේරුම්ගන්න බැහැ. අපි කතාකරන්නේ, යුද්ධයකදී, කොහොමද ක්‍රියාන්විත සැළැස්මක් හදන්නේ කියන එකයි. මේ සඳහා අපි ආධාර කරගන්නවා, ප්‍රේමපාල සහ කාමිණී කියන දෙදෙනාගේ ආදර හුටපටය. මේ දෙන්නගේ ආදරයට, කාමිණීගේ පැත්තේ අය, යුද්ධ ප්‍රකාශ කරලා තියෙන්නේ. ඉතිං, ප්‍රේමපාල ක්‍රියාන්විතයක් සැළසුම් කරමින් ඉන්නවා, කාමිණීව ඇගේ ගෙදරින් පන්නාගෙන, තම ප්‍රේම විමුක්තිය සොයා යන්නට. අන්න ඒ සැළැස්ම හදනකොට, වැදගත්වන කරුණු තමයි, අපි මේ සාකච්ඡා කරමින් ඉන්නේ. 

   දැන් හරි නේද? ඔක්කොම වල් පල් ඔලුවෙන් අයින් කරලා, හොඳ අවධානයෙන් කියවන්න. නැත්නම් ක්‍රියාන්විතය 'හබක්' :D අපි, පසුගිය ලිපියේදී, ක්‍රියාන්විතයේ අරමුණ - Aim සහ ක්‍රියාන්විතය සැළසුම් කිරීමේදී වැදගත්වන සාධක - Factors වලින්, මූලික කොටස් දෙකක් පමණක් සාකච්ඡා කළා. කොහෙද, හිත එකලස් කරගෙන, ඔලුව නිදහසේ තියාගෙන, මෙව්වා කරන්න ලැබෙන්නේ නැහැනේ. එහෙන් කෝච්චි ස්ට්‍රයික් එකක් ආවා. ඊළඟට බයිසිකල් සෙල්ලමක් ආවා. මෙව්වා හින්දා, මේ ලිපිය ලියන එකත් පමාවුණා. අර ලිපි දෙකෙන් කියලා තිබුණ දේවල් දැක්කම, කොහොමද අනේ නොදැක්කා වගේ ඉන්නේ. ඒ නිසයි මේ ලිපිය පොඩ්ඩක් ප්‍රමාද කරලා, ඒ කාරණා ගැන දෙකක් කියලා හිටියේ. හරි හරි එව්වයින් කමක් නැහැ. බහිමුකො යුද්දෙට. 

අද මුලින්ම බලමු, පසුගිය ලිපියේදී සාකච්ඡා කරන්න පටන්ගත්තු, 'සාධක - Factors'  වල ඉතිරි කොටස්. අපි අන්තිමට කතාකළේ භූමිය සහ කාලගුණ තත්වය යටතේ, අපි මේ ක්‍රියාන්විතය කරන්න යන ප්‍රදේශය මොන වගේ එකක්ද යන්න, සවිස්තරව හඳුනා ගැනීමයි. (Ground and Weather > Ground in General) මතකනේ කොහෙද මේ ක්‍රියාන්විතය සිදුකිරීමට නියමිත කියලා. මතක නෑ. ඔන්න ඉතිං ඊටිං ද විලේජ් කියන්නේ ඕකට තමයි. ඇයි අනේ අපි මේ වැඩේ දෙන්න යන්නේ. නුගේගොඩ පාගොඩ ප්‍රදේශය ආශ්‍රිත, දේවාල පාරේ කියලා, සිතියමකුත් දාලා, කතාකළා මතක නැද්ද පහුගිය කොටසේදී? හපොයි...... තමුන්නාන්සේලා වගේ විශිෂ්ට මතකයක් තියන උන්නැහේලා ටිකක් එක්ක, යුද්දයකට යන්න ලැබීම, මගේ පූරුවේ ????? ක්. 


3. බාධක - Obstacles


10   මේ සාධකයෙදී සලකා බලන්නේ, අපිට ක්‍රියාන්විතය කරන්න සිදුවී තිබෙන ප්‍රදේශයේ ගමන් කිරීමේදී, කෙබඳු ආකාරයේ බාධක වලට මුහුණ දෙන්න වෙයිද කියන එකයි. ගංගා, වැව්, මඩ වගුරු, කුඹුරු යායවල්, මහ කඳු, ජනාවාස, තාප්ප, වැටවල්, ඔය කොයි ඒවාත් බාධක. මහ කැලයක් නම්, වන සතුන් ඉන්නවා. නාගරික පෙදෙස්වල රාත්‍රියට පාරේ ඉන්න බල්ලන් නිසා හරි කරදරයි.  බල්ලන්ගේ බිරීම නිසා අපේ ගමන මිනිස්සුන්ට දැනෙන්න පුළුවන්.



4. ආවරණ - Covers 

soldiers    අපි මේ යන්නේ කෙල්ලෙක් උස්සන්න නේ. නිකං චිත්‍රපටියක වගේ, 'චෙස්ට් ෆෝවඩ් දාලා, පුක් බැක් දාලා' යන්න බැහැ. කෙල්ලගේ ගේ ළඟට කිට්ටු කරනකොට, අරවට මෙව්වට මුවාවෙමින් තමයි යන්න ඕනෙ. නැත්තං, කෙල්ලගේ බාප්පොච්චි අතේ තියනවා කිව්ව කටපුංචා ගෙන්, කළු කුඩු බස්නේ ලැබෙන්ඩ ඉඩ තියනවා. මොනවද අපිට මුවාවෙන්න හැකි ස්ථාන හෙවත් ආවරණ කියන එක, සිතියමකින් බලන්න පුළුවන්. මගේ යාලුවෙකුට පුළුවන්, මේ කෙල්ලගේ ගේ පැත්තේ කරක් ගහලා හොයාගන්න, ආවරණ වශයෙන් පාවිච්චි කළහැකි ස්ථාන. පාර අයිනේ තියන ලොකු දැන්වීම් පුවරුවක් වුනත් ආවරණයක් තමයි.


5. මාර්ග සහ ප්‍රවාහනය -

Roads and Transport  


M   දැන් අපි දන්නවා, අපිට යන්ඩ අවශ්‍ය, නුගේගොඩ (පිටකෝට්ටේ කිව්වත් හරි) දේවාල පාරට බව. ඉතිං, මෙතනට යන්ඩ පාරවල් කීයක් තියනවද? නෑ නෑ, එහෙම මේ ඒ ළඟම වටේ තියන පාරවල් නෙවෙයි. මතක නැද්ද ප්‍රේමපාල ඉන්නේ කොහෙද කියලා? අවිස්සාවේල්ලේ. හයියෝ..........ඔන්න ඔය වෙලාවට තමයි ඉතිං දෙන්න හිතෙන්නේ.......... කණ පැලෙන්න කකුල් දෙකටම. දැන් හිතලා බලන්න, ප්‍රේමපාලට පුළුවන්, හයිලෙවල් පාරදිගේ නුගේගොඩට ඇවිත්, පාගොඩ පාර දිගේ එන්ඩ. නැත්නම් හයිලෙවල් එකේ ඇවිත්, මහරගම නාවින්න හන්දියෙන් දකුණට හැරිලා, ජුබිලි කනුව හන්දිය පහුකරලා, පිටකෝට්ටේ හන්දිය හරහා එන්ඩ. ලෝ ලෙවල් පාර දිගේ ඇවිත්, කඩුවෙල, බත්තරමුල්ල, ඇතුල් කෝට්ටේ, හරහා එන්ඩ. ඇතුල් කෝට්ටෙන් හැරෙන්නැතුව, බොරැල්ල, ඇස් වාට්ටුව, පැත්තෙන් කැරකිලා, හයිලෙවල් එක දිගේ නුගේගොඩ පැත්තෙන් එන්ඩ. (මම දන්නේ නැති පාරවල් ඔයා කියන්ඩකො) ඔන්න ඔහොම, පාරවල් සෑම එකක් ගැනම, මුලින්ම සළකා බලන්න ඕනෙ. මොකද, ඒ සෑම පාරකම, වාසි අවාසි දෙකම තියනවා. එතකොට ප්‍රවාහනය. ඔව්, එතැනදී බලන්නේ, මොනවගේ වාහනද මේ ගමනට සුදුසු, වාහන වලින් බැහැලා පයින් යන්න අවශ්‍යද? එහෙනම් ඒ කොතෙන්දිද? ඔන්න ඕවා තමයි ප්‍රවාහනය යටතේ හිතන්න ඕනෙ.


6. ළඟාවිය හැකි මාර්ග - Approaches 

    පාරවල් කොච්චර තිබුණත් මෙතනට ළඟාවීම සඳහා සුදුසුම මාර්ග ගැන විශේෂයෙන් සළකා බැලිය යුතුයි. අඩුම ගණනේ එවැනි ළඟාවීමේ මාර්ග තුනක් වත් හොයාගන්න පුලුවන්නම් හොඳයි. හොඳයි නෙවෙයි කොහොම හරි හොයාගන්න ඕනෙ. දැන් මේ කෙල්ලගේ ගෙදර අවට තියන වෙනත් ගෙවල්වල පිළිකන්න පැත්තෙන් වුනත් ළඟාවීමේ මාර්ග තියෙන්න පුළුවන්. මෙතනදී එක් එක් ළඟාවීමේ මාර්ගය ගැන,

i. සවිස්තරාත්මක හැඳින්වීමක්

ii. ඒ ඒ ස්ථාන වලට ඇති දුර කොපමණද යන්න පැහැදිලි කිරීමක් අනිවාර්යයයෙන් තිබිය යුතුයි.

iii. මාර්ගයේ ස්වභාවය අනුව ගමන ඉතා පහසු/පහසු/සතුටුදායක/ ආදී වශයෙන් වර්ග කර පෙන්විය යුතුයි.

iv. ඒ ඒ මාර්ගය අනුව කොපමණ භට පිරිසක් යෙදවිය හැකිද යන්න පැහැදිලි කලයුතුයි.

v. ඒ ප්‍රදේශයේ තිබෙන, සටනේදී වැදගත්වන ස්ථාන, (උස් බිමක්, උස ගොඩනැගිල්ලක්, තාප්ප වලින් වටවූ ආවරණ ප්‍රදේශයක්, පාලමක්, වැනි) මොනවාදැයි විස්තර කලයුතුයි.

vi. එක ළඟාවීමක් අවුල් සහගත තත්වයකට පත්වුනොත් අනෙක් ළඟාවීමක සිට ආධාරක භට පිරිස්වල ආධාරය ලබාගත හැකිදයන්න පැහැදිළි කලයුතුයි.

vii. කොපමණ ආවරණ ගණනක් ඇත්ත වශයෙන්ම තිබේද යන්න පැහැදිළිව දැනසිටිය යුතුයි.

viii. මේ පාරෙන් ගියොත් මෙතනට වැටෙනවා යන දැණුම තිබිය යුතුයි. (නිවැරදි දිසාවට යාමේ හැකියාව)

ix.  අපි සතුරු ප්‍රදේශයට ගොස්,  අපේ මුළු හමුදාවම එකතුවන්නේ, මෙන්න මෙතෙන්ට = Assembly Area,  ක්‍රියාන්විත කණ්ඩායම මුලින්ම එකතුවන්නේ, මෙන්න මෙතෙන්ට = Forward Base, ක්‍රියාන්විත කණ්ඩායම, වැඩේ පටන් ගන්න ආසන්නව රැඳෙන්නේ, මෙන්න මෙතන = Forming up Place යන දේවල්, කල් තබා සැළසුම් කළයුතු අතර, කණ්ඩායමේ සෑම දෙනාම ඒවා දැන සිටිය යුතුයි.


7. ඉලක්කගත ප්‍රදේශය අවට භූමි ලක්ෂණ (ස්වභාවය)

   වැඩේ දෙන්න යන ප්‍රදේශය ගැන දැනගන්න පුළුවන් හැම දෙයක්ම, පුළුවන් තරම් දුරට, දැනගෙන හිටිය තරමට, ක්‍රියාන්විතය පහසු වෙනවා. සාර්ථක වෙනවා. අපි යන්නේ නුහුරු තැනකට. ඒ නිසා, එතන කොයිවගේද කියන එක, විවිධ කරුණු ඔස්සේ සලකා බලනවා. ඒ මෙන්න මෙහෙමයි.

i. විශාලත්වය (දිග පළල):- අපිට අදාළ ඉලක්කය තිබෙන්නේ කොපමණ විශාලත්වයක පැතිරීමක් සහිතවද? උදාහරණය; කෙල්ලගෙ ගෙදර තියෙන්නේ පර්චස් 20 ක විතර ඉඩමක.

ii. හැඩතල මොන වගේද. උදාහරණය; ඉඩම වටේ කොට තාප්පයක් තියනවා. හරි හතරැස් නෙවෙයි. ගෙයි ඉදිරිපස මායිමයි පසුපස මායිමයි දිගයි. අනික් මායිම් දෙක ඊට වඩා කෙටියි. දෙපැත්තක් තියෙන්නේ පාරවල් දෙකකට. ඒ කියන්නේ ඉස්සරහ පැත්තයි, අපි ගෙදරට මූණ දෙනකොට, අපේ වම් පැත්තයි. සමතලා බිමක්. ගෙදර සැළැස්ම, ඉස්සරහ දොර තියන විදිහ, ඒ දොර හැර, ගෙට ඇතුළුවිය හැකි වෙනත් දොරවල්, කඩාගෙන යන්න පුළුවන් දොරවල්/ජනෙල් තියනවාද, කෙල්ල ඉන්නවායයි අනුමාන කරන කාමරය, ගෙදර අනික් අය ඉන්න කාමර,  සී සී ටී වී කැමරා තිබේද, බල්ලන් ඉන්නවාද, බලු කූඩුව කොතනද තියෙන්නේ.

 iii. අපි එකවරම ගෙට කඩාගෙන පැන්නම එන ප්‍රති ප්‍රහාර වැලැක්වීම සඳහා, අපේ ක්ෂණික ප්‍රහාරක කණ්ඩායම් කීයක් විතර දාන්න වෙයිද.

iv. කෙල්ල ඉස්සීමේ මෙහෙයුම සඳහා ගෙට ඇතුළුවීමට ඉතාම සුදුසු ගෙදර කොයි පැත්තෙන්ද

v. අපේ කණ්ඩායමේ එක් එක් අය, කොතනින්, කොයි වෙලාවටද, ඇතුළුවෙන්නේ

vi. කෙල්ලගේ ගෙට ආසන්නවම තියන, අනිවාර්යයෙන් ජයගතයුතු බාධක. උදාහරණ; තාප්පය, කෙල්ලගේ ගෙදර ඉන්න බල්ලා,


8. කාලගුණය (දේශගුණය) :-

i. මේ දවස්වල ඒ පැත්තේ කාලගුණ තත්වය කොහොමද. දවසේ නිශ්චිත වේලාවකදී මහ වැහි ලැබෙනවද, වැස්ස නැද්ද,


9. සැකසුම් - Deductions 

   ඔන්න මේ ලිපිය ලියන්න ගිහින්, මම අමාරුවේ වැටුණ තැනක් මේක. මොකද, හමුදා පොතේ තියන ඉංග්‍රීසි යෙදුම්, සිංහලෙන් කියන එක හරිම අමාරුයි. හමුදාවේදී මෙව්වා කවදාවත් සිංහලෙන් උගන්නන්නේ නැහැ. හමුදා ක්‍රියාන්විත සැළැස්මකදී, මෙතන මේ deductions කියන්නේ, සාමාන්‍ය ව්‍යවහාරයේදී, අඩුකරනවා කියන තේරුමෙන් නෙවෙයි. ක්‍රියාන්විතයට අදාළ, ඒ ඒ පියවර සඳහා, ඉතා තර්කානුකූලව සහ බුද්ධිමත්ව සිතාබලා, ගතයුතු හොඳම පියවර කුමක්ද යන්න, තීරණය කිරීමයි. මේ සඳහා, හමුදා මූලෝපාය ඥානය - Military Tactical Knowledge ඉතා ඉහළ මට්ටමකින් තිබිය යුතුයි.

61   පොඩි උදාහරණයක් කියන්නම්, අපේ මේ කතාවේ එන කෙල්ලවම සම්බන්ධ කරලා. ඔන්න ඔයාට කෙල්ල කියනවා, හෙට අපි දෙන්න උදේ වරුවේ පිචෑර්ස් එකක් එහෙම බලලා, දවල් හොඳ හෝටලේකින් කාලා, හැන්දෑවේ බීච් එකටත් ඇන්ටර් වෙලා, පොඩි වෝක් එකක් දාලා, වැටකෙයා පඳුරක පහසත් විඳලා, එමු කියලා.

   දැන් ඉතිං ඔහේගේ දනිස් දෙක මැන්ඩලින් ගහන්න පටන් ගන්නවා. නෙද්දකිං විතරක් මේ ......ට ......න යන්න ඕනෙ වුණේ, මගේ අතේ සතේ නැති දවසකමනේ. ඇයි යකෝ, පඩිගන්න තව සුමානයක් තියනවා. මොන .........ද මම සල්ලි හොයන්නේ? ඒ මදිවට පිචර් බලන්නයි, කන්නයි, බීච් යන්නයි, මොන ........ද?

   හ්ම්.........නොගියොත් මගේ පටිරෝල් වෙනවා. කාඩ් කුඩු වෙනවා. අමාරුවෙන් අටවගත්ත (අටම්පහුර නෙවෙයි) ලව් එකට කෙළවෙනවා. ඉතිං මොකේදැයි දන් වළඳන්නේ කිව්වලු. ඒ මදිවට නිවාඩුවක් ගන්න වෙනවා. ටිකක් හොඳ ෂර්ට් එකකුයි කලිසමකුයි අඳින්න වෙනවා. සපත්තු දෙකකුත් හොයාගන්න වෙනවා. වියදමට සල්ලි.........? බස් ගාස්තු ත්‍රී වීල් ගාස්තු කීයක් විතර යයිද.........? පිචර් හෝල් එකේ ටිකට් වලට....අනිවාර්යයෙන් මේකි ඉන්ටවල් එකට අයිස් චොක්ස් ඉල්ලනවා.......අයිස් චොක්ස් නෙවෙයි දෙන්න හිතෙනවා........දවල් කෑමට.....ෆ්‍රයිඩ් රයිස්, කොකා කෝලා, ඩෙසර්ට්? ඇයි බීච් එකේදිත් එක එක ජාති ඉල්ලයි..........බුදු අම්මේ........මං වැටිච්ච අමාරුව. මේකිව බැන්දට පස්සේ, මගේ ඇටකටු වලින් සුප් හදලා බොයිද දන්නේ නෑ........

   දැන් මෙහෙම හිතන්න. දැන් ඔය ඉහළ ඡේද දෙකේ තියන ප්‍රශ්න විසඳගන්න ඔබ මොනවද කරන්නේ? ඉස්සරවෙලාම නිවාඩු ගැනීම. නිවාඩුවක් ඉල්ලන්න, සාධාරණ (කපටි) කරුණු දෙක තුනක් හිතන්න වෙනවා නේද? එයින් එකක් තමා අන්තිමට තෝරාගන්නේ. සල්ලි හොයාගැනීම? ඔයාගේ අතේ දැනට තියනවා මෙච්චරක්, යාළුවෙකුගෙන් ඉල්ලා ගන්නවා මෙච්චරක්, වියදම අඩුකරගන්න, සෑහෙන කල්වේලා ඇතුව පයින් යනවා සෑහෙන දුරක්, නැත්නම් යාලුවෙකුගේ බයිසිකලයකින් ගිහින් දම්මවා ගන්නවා, අහළ පහළ ඉන්න අය ඔයා ගැන නිතර හොයන අය කියලා හිතන්න. ෂර්ට්, කලිසම්, සපත්තු, එහෙම යාළුවෙකුගෙන් ගජේ ගහගන්න පුළුවන්නේ........වෙනදා නොයන විදිහට, ජැන්ඩි පහට ඇඳලා, කොහෙද යන්නේ කියලා හොයන එකෙන් ගැලවෙන්න, එක්කෝ බොරුවක් ලැස්ති කරගන්න ඕනෙ. නැත්නම් පාන්දරින් යන්න ඕනෙ, එහෙමත් නැත්නම් සාමාන්‍ය ඇඳුමක් ඇඳගෙන ගිහින්, වෙන තැනකදී කිට් බිට් ගහගන්න ඕනෙ. කෙල්ල ඔයාව හම්බවෙන්න එන්ඩ කියන තැනට යන පාරේ, ඔයාගේ නෑදෑයෝ ඉන්නවා. ඒ අයගේ අවධානයට ලක් නොවෙන්න, වෙන පාරකින් යන්න වෙනවා. දැන් හිතලා බලන්න යුද්ධයක් වගේ නේද මේක? ඉතිං යුද්දෙදිත් ඔහොමම තමා වෙන්නේ. බලමු කොහොමද වෙන්නේ කියලා. 

i. ඉලක්කය වෙත ළඟාවීමේ මාර්ග ප්‍රමුඛතාව සැකසීම. (අපි කලින් කියලා තියනවනේ කෙල්ලගේ ගෙදරට යන්න පුළුවන් පාරවල් කීපයක් ගැන. අවසාන වශයෙන් එයි පාරවල් තුනක් පමණ තෝරාගන්නවා. ඉන්පසු බොහොම කල්පනාකාරීව සලකා බලා අවසාන තීරණය ගන්නවා මෙන්න මේ පාරෙන් තමයි යන්නේ කියලා) ඒ පාර, සැලැස්මේ ලකුණු කරන්න ඕනෙ.

ii. භට පිරිසේ සංයුතිය. (මේ වැඩේට මට මොන වගේ අය හිටියොත්ද වඩාත් සාර්ථකව වැඩේ කරන්න පුළුවන් වෙන්නේ? ත්‍රී වීල් ඩ්‍රයිවර්ලා දෙන්නයි, මොටෝබයික් දෙකයි, කාර් එකයි, හොඳට ගහගන්න පුළුවන් එවුන් හතර දෙනයි, ඔන්න ඔය විදිහට යුද්දෙදි නම් කාලතුවක්කු, යුද ටැංකි, මෝටාර්, මැෂින් තුවක්කු,භට පිරිස්, ආදිය)

iii. කෙල්ලගේ ගෙදර ගේට්ටුව කඩාගෙන ඇතුලට දානවද බයිසිකල්? (යුද්දෙදි නම් ප්‍රහාරක අවස්ථාවේ දී යුද ටැංකි යොදාගන්නවාද? මෙහි වාසි අවාසි දෙකම තියෙන්න පුළුවන් නිසා, ඉතා කල්පනාවෙන් කලයුතුයි. බලන්න, බයිසිකල් දෙක ගෙදර මිදුලට ගැනීමේදීත්, වාසි අවාසි දෙකම තියෙන්න පුළුවන්)

iv. කඩු, පොලු, බයිසිකල් චේන්, රම්බෝ පිහියා, එහෙම ගෙනියනවානම්, එව්වා අතේ තියන අය කොතන ඉඳලද වැඩේ කරන්නේ.? (යුද්දෙදි නම්, කාලතුවක්කු, මල්ටි බැරල්, මෝටාර්, ලොකු මැෂින් තුවක්කු, ස්ථාන ගත කරන්නේ කුමන ස්ථාන වලද?)

v. හරියටම කොයි වෙලාවටද ගේම් එක පටන් ගන්නේ. (හරියටම මෙන්න මේ වෙලාවට කියලා අනිවාර්යයෙන් තීරණය කළයුතුයි. ඊට පෙර එහෙමෙහෙ රස්තියාදුවේ යන්නේ නැහැ. එහෙම ගියොත් සැක ඇතිවෙලා, සතුරා අපට කලින් ක්‍රියාත්මක වෙන්න පුළුවන්)

vi. කෙල්ලගේ ගෙදර ගේට්ටුව වහලා තිබුනොත් කඩාගෙන යන්නේ කොහොමද කියන එක සහ අපි ඇතුළට කියාට පස්සේ වැහුවොත්, ඒක කඩන්නේ කොහොමද? (යුද්දෙදි නම් ඉංජිනේරු බලකායේ සහාය ගන්නවද. ඉංජිනේරු බලකාය කරන්නේ, අපිට බාධාවන දේවල් පුපුරවා හරිනවා, පාරවල් ක්ෂණිකව හදා දෙනවා. සතුරාට අපි ළඟට එන්න බැරි විදිහට බාධක ඇති කරනවා. ඉංජිනේරු සහාය අවශ්‍ය නම්, ඒ සඳහා කල්තියා සැළැස්මක් හැදිය යුතුයි.)

හරි අදට මේ ඇති.

මතු සම්බන්ධයි.........!!!!



my-signature-for-blog[1]    2014 ඔක්තෝබර් මස 18 වැනි දින 0031 පැය
.emoWrap { position:relative; padding:10px; margin-bottom:7px; background:#fff; /* IE10 Consumer Preview */ background-image: -ms-linear-gradient(right, #FFFFFF 0%, #FFF9F2 100%); /* Mozilla Firefox */ background-image: -moz-linear-gradient(right, #FFFFFF 0%, #FFF9F2 100%); /* Opera */ background-image: -o-linear-gradient(right, #FFFFFF 0%, #FFF9F2 100%); /* Webkit (Safari/Chrome 10) */ background-image: -webkit-gradient(linear, right top, left top, color-stop(0, #FFFFFF), color-stop(1, #FFF9F2)); /* Webkit (Chrome 11+) */ background-image: -webkit-linear-gradient(right, #FFFFFF 0%, #FFF9F2 100%); /* W3C Markup, IE10 Release Preview */ background-image: linear-gradient(to left, #FFFFFF 0%, #FFF9F2 100%); border:3px solid #860000; -moz-border-radius:5px; -webkit-border-radius:5px; border-radius:5px; box-shadow:0 4px 6px rgba(0,0,0,0.1),0 1px 1px rgba(0,0,0,0.3); -moz-box-shadow:0 4px 6px rgba(0,0,0,0.1),0 1px 1px rgba(0,0,0,0.3); -webkit-box-shadow:0 4px 6px rgba(0,0,0,0.1),0 1px 1px rgba(0,0,0,0.3); box-shadow:0 2px 6px rgba(0,0,0,0.1),0 1px 1px rgba(0,0,0,0.3); font-weight:normal; color:#333; } .emoWrap:after { content:""; position:absolute; bottom:-10px; left:10px; border-top:10px solid #860000; border-right:20px solid transparent; width:0; height:0; line-height:0; }