අපි දැකපු කාර් (දෙවැනි කොටස) Vintage Cars in Our Time (Part Two)

 මතකයි නේද මේ කතාවේ පළමුවැනි කොටස. මතක නැතිනම් මෙන්න මෙතනින් ගිහින් බලලා එන්න. කතාවේ පළමුවැනි කොටසේදී මා අතින් සිදුවුණු අඩුපාඩු කීපයක් නිවැරදි කර ගැනීම, අද ලිපියේදී මුලින්ම කලොත් හොඳා කියලා හිතුනා. ඒ අඩුපාඩු පෙන්වාදුන් winiwidimi, ඔස්ටින් අයියා, සහ තවත් නිර්නාමික බොහෝ දෙනෙකුට මගේ අවංක ස්තුතිය පිළිගන්වන්නට කැමතියි. ඔවුන් පෙන්වාදුන් අඩුපාඩු සම්පූර්ණ කරගෙන එමෙන්ම ඔවුන් මතක් කරදුන් තොරතුරුත් ඇතුළත් කරගෙන, මේ ලිපි මාලාව ඉදිරියට ගෙනයනවා. පසුගිය ලිපියේදී මොරිස් වාහන ගැන කියද්දී අපේ රටේ අතිශයින් ජනප්‍රිය වුනු මොරිස් 1000 මෝස්තරය වෙනමම පෙන්වන්න බැරිවුනා. මේ වාහනය තමයි ඒ කාලේ ටැක්සි හෙවත් කුලී රථ සඳහා බහුලවම යොදාගත්තේ. කහපාටින් වර්ණ ගැන්වූ වහලය, කලුපාට බඳ, පිටතින් සවිකළ විශාල ටැක්සි මීටරය, මට අදටත් මතකයි. හැබැයි ඒ කාලේ අපිනම් මේ ටැක්සියක ගියේ ඉතාම කලාතුරකින්. එයට හේතුව ඒ සඳහා මුදල් අපි අතේ නොතිබීමයි. ඔන්න පහත පින්තූරයේ තියනවා මොරිස් 1000 රථය.

  ඒ වගේම මට පසුගිය ලිපියේදී අමතක වුන තවත් කාර් දෙකක් තමයි ඔස්ටින් මිනි කූපර් Austin Mini Cooper රථය සහ මොරිස් මිනි කූපර් Morris Mini Cooper රථය. මේවා අද පවා ඉතාම ජනප්‍රිය වාහන. මට මතක් වෙනවා 1969 වර්ෂයේදී ලෝකය පුරා ජනප්‍රිය වූ The Italian Job නමැති චිත්‍රපටිය. මා ඒ චිත්‍රපටිය නැරඹුවේ, අද වනවිට වැසීගොස් තිබෙන, කෑගල්ලේ, 'පරාක්‍රම' සිනමාහලේදීයි.මේ චිත්‍රපටියේ තිබෙන්නේ රත්තරං මංකොල්ලයක කතාවක්. මංකොල්ලකාගත් රත්‍රන් තොගයක් සමාන කොටස් තුනකට බෙදා මිනි කූපර් රථ තුනකින් ඉතාලියේ සිට ස්විට්සර්ලන්තයට රැගෙන යාමට දරන උත්සාහය ඉතාම නාටකීය ආකාරයකින් ඉදිරිපත් කරනවා. ඒ චිත්‍රපටියේ අදාළ ජවනිකාවෙන් කොටසක් පහතින් බලන්න. 

ඔස්ටින් සහ මොරිස් යන දෙවර්ගයේම මිනි කූපර් රථ පහතින් දැක්වෙනවා.

  මිනි කූපර් රථය වගේම ජනප්‍රිය රථයක් තමයි ඔස්ටින් මිනි මොක් Austin Mini Moke  රථය. විශේෂයෙන් 1970 දශකයේදී ලංකාවේ ධනවත් මෝටර් රථ හිමියන් අතර මේ රථය අතිශයින් ජනප්‍රියව තිබුණා. හිටපු ජනාධිපති රණසිංහ ප්‍රේමදාස මහතාත්, ඒ කාලයේ, 'ගම් උදාව' ප්‍රදර්ශණය බලන්න, මේ රථයකින් ආවා මට මතකයි.

  ඊළඟට මම කැමතියි ඔබ සමග කතාකරන්න අපි දැකපු ෆෝර්ඩ් Ford කාර් ගැන. ෆෝර්ඩ් වාහන ඇමරිකානු නිෂ්පාදනයක් බව ඔබ දන්නවා ඇති. මම මේ ලිපියේදී කතාකරන්නේ කාර් ගැන පමණක් නිසා ෆෝර්ඩ් ලොරි, වෑන්, ආදිය ගැන කතාකරන්නේ නැහැ. අපි පුංචි ළමයි හැටියට දැකපු ෆෝර්ඩ් කාර් පසු කාලයේදී ලංකාවේදී හැඳින්වුණේ දඬු ෆෝර්ඩ් කියන නමින්    :D      ඇත්තටම මේ පහත තියන පින්තූරය බැලුවම ඔබටත් හිතෙයි ඒ නම් ඒ වාහනයට ගැලපෙනවා කියලා.

  නමුත් දඬු ෆෝර්ඩ් එකට පස්සේ ආව ෆෝර්ඩ් ප්‍රිෆෙක්ට් කාරය පවුලේ වාහනයක් මෙන්ම කුලී රථයක් වශයෙන්ද බොහොම ජනප්‍රිය වුණා. 

  නමුත් මින් පසු කාලයේ පැමිණි ෆෝර්ඩ් කොන්සල් Ford Consul රථය එතරම් ජනප්‍රිය නොවුනේ එය විශාල කාරයක් වීම නිසාත් ඉන්ධන කාර්යක්‍ෂමතාව අතින් පහත් මට්ටමක තිබුණු නිසාත් වන්නට ඇති.

1950 දශකයෙන් ආරම්භවී 1960 - 70 දශක වලදී අතිශයින් ජනප්‍රිය වූ ෆෝර්ඩ් ඇන්ග්ලියා Ford Anglia කාරය ඒ කාලේ හරිම 'මනමාල' කාර් එකක් ලෙසයි බොහෝ දෙනා ඒ කාලේ හැඳින්වූවේ. ඒ කාලේ තිබුන ලස්සනම, වේගවත්ම, රථ අතරින් එකක් ලෙස මෙය හඳුන්වන්න පුළුවන්. විශේෂයෙන් තරුණ පරපුර අතර මේ රථය වඩාත් ජනප්‍රිය වුණා.

  ෆෝර්ඩ් ඇන්ග්ලියා රථයේ කැපී පෙනෙන වෙනස්කමක් වුණේ එහි පසුපස වීදුරුව ඇතුළට එබී තිබෙන ආකාරයට සකසා තිබීමයි. වෙනත් කිසිම කාරයක මෙවැනි ආකාරයට සැකසු පසුපස වීදුරුවක් මා දැක නැහැ.

  ෆෝර්ඩ් වාහන අතර 1970 දශකයෙන් ආරම්භවී සෑහෙන ජනප්‍රියත්වයක් ලැබූ කාර් මෝස්තරයක් ලෙස ෆෝර්ඩ් එස්කෝට් Ford Escort කාරයටත් විශේෂ වැදගත්කමක් හිමිවෙනවා.  

  කෙසේ වෙතත් ෆෝර්ඩ් කාර් අතරින් උපරිම ජනප්‍රියත්වයට පත්වුයේ ෆෝර්ඩ් කෝටිනා නමින්, මෝස්‌තර කීපයකින් පැමිණි වාහනයි. ඒ සෑම මොස්තරයක්ම මෙහි දක්වන්නට මා අදහස් කරන්නේ නැහැ. මේ මෝස්තර 1980 - 90 දශක වලදී පවා ජනප්‍රියව තිබුණා. මා මෙහි දක්වන්නේ එයින් ඉතාම මහේශාඛ්‍ය පෙනණුමකින් යුක්තවූ ෆෝර්ඩ් කෝටිනා මාක් III,  Ford Cortina Mk III රථයයි.

  

  මීළඟට මා ඔබට පෙන්වන්නේ එක්සත් රාජධානියේ තවත් නිෂ්පාදනයක් වන හිල්මන් වාහන දෙකක්. Hillman මේ වාහන මෝස්‌තර දෙක එකල නිතර අපේ රටේ මහා මාර්ගවල දකින්නට ලැබුණා. ඒ අතරින් වඩාත් ජනප්‍රිය වුණේ පහත දැක්වෙන කාර් පින්තූර දෙකෙන් දෙවැනි පින්තූරයේ තිබෙන හිල්මන් මින්ක්ස් රථයයි.

  අපි කුඩා කාලයේ ඉතාම සුඛෝපභෝගී වාහන ලෙස සැළකුණ, එමෙන්ම ඒ කාලයේ හැටියට මිල අධික, ජර්මන් නිෂ්පාදනයන් වූ, වාහන දෙකක්, මීළඟට ඔබට ඉදිරිපත් කරනවා. ඒ තමයි ඕපල් Opel  නමැති වාහන වර්ගය. මෙයින් මුලින්ම පෙන්වන ඕපල් රෙකෝර්ඩ් රථයේ නම, Opel Rekord අපි උච්ඡාරණය කලේ 'ඕපල් රෙකාඩ්' ලෙසයි. මෙම කාරයට අද තිබෙන ටොයෝටා ඇලියොන් රථයකට තිබෙන පිළිගැනීම තිබුණා.

 ඕපල් වාහන වල වඩාත් සුඛෝපභෝගී මෝස්තරය වුයේ ඕපල් කපිතාන් Opel Kapitan කාරයයි. මෙය විශාල වාහනයක්. බොහොම ගරු ගාම්භීර පෙණුමක් තිබුණා.

  මා හිතනවා අද ලිපිය මෙතෙකින් අවසන් කළයුතුයැයි කියා. මෙම ලිපි මාලාව තවත් කොටස් කීපයක් දක්වා ගෙනයන්නට තරම් තොරතුරු මා රැස්කරගෙන තිබෙනවා. ඒ සමගම ඔබේ අදහස් සහ කරුණු නිවැරදි කිරීම් ද බලාපොරොත්තු වෙනවා.

      2014 අප්‍රේල් මස 25 දින 0025 පැය

අපි දැකපු කාර් (පළමුවැනි කොටස) - Vintage Cars in Our Time (Part One)

   මතකද මම කලකට පෙර ලිපි පෙළක් ලිව්වා, 'අපි අහපු වෑර්ලස්' කියලා. අද ලියන්න යන්නේ ඒ හා සමානවම ඒ කාලේ අපි දැකපු කාර් ගැනයි. මේ එක එක කාර් ගැන දිග විස්තර ලියන්න හැකියාව සහ මතකය තිබුණත්, සියලුම හැඳින්වීම් හැකිතරම් කෙටියෙන් කරන්න හිතුවා. අද වුනත් විවධ කාර් මෝස්‌තර ගැන උනන්දුවක් දක්වන අය සෑහෙන්න ඉන්නවා. එමෙන්ම විවිධ කාර් මෝස්‌තර රාශියක් තිබෙනවා. ඒ මෝස්‌තර ඉතා වේගයෙන් අලුත් වෙනවා. අපි කුඩා පාසල් සිසුන් හැටියට සිටි කාලේ මේ රටේ තිබුණු සීමිත කාර් වර්ග සහ මෝස්‌තර අපේ මතකයේ හොඳින් තැන්පත් වුණා. ඒ මතකය අවදි කිරීමක් තමයි මේ කරන්නේ. මා හිතනවා මේ කාර් ගැන දන්න අය ඔබ අතර ඇති. ඉතින් එවැනි අයට පුළුවන් මේ ලිපියේ අඩුපාඩු සම්පූර්ණ කරන්න. එහෙනම් පටන් ගනිමුද?

   හැබැයි මේක ලේසි වැඩක් නෙවේ. මතක් වෙන පිළිවෙලටයි මම ලියන්නේ. ඔබ අතරින්, මේ කාර් අපේ රටට ආව කාලය දන්නා කෙනෙක් ඉන්නවනම් කියන්න, මොන රථයද මුලින්ම ආවේ කියලා.

   මගේ මතකයට මුලින්ම එන්නේ මොරිස් වර්ගයේ කාර්. අපි කුඩා කාලයේ වැඩිපුරම දැක්කේ මොරිස් වර්ගයේ වාහන. 1912 දී තමයි මොරිස් සමාගම එංගලන්තයේ ආරම්භ කර තිබෙන්නේ. මෙන්න මගේ මතකයේ ඇති මොරිස් රථ කීපයක්. ඊට පෙර බලන්න මොරිස් ලාංචනය කාලීනව වෙනස්වී ඇති ආකාරය.

ඉහත ඇති මොරිස් එයිට් රථය 1936 දී නිපදවන ලද්දක්.  

  මේ රථයක්  1960 දශකයේදී කෑගල්ල ප්‍රදේශයේ තිබුණා මට මතකයි. නමුත් වඩාත් බහුලවම දකින්න ලැබුනේ මේ පහළින් තියන මොරිස් එයිට් මෝස්තරයයි. 

මෙය මොරිස් එයිට් 'ඊ' මෝස්තරයේ රථයක්

   මොරිස් වර්ගයේ කාර් අතරින් ලංකාවේ අතිශයින්ම ජනප්‍රිය වුණේ මොරිස් මයිනර්, මොරිස් මයිනර් ටුවරර්, සහ මොරිස් 1000 යන මෝස්තරයි. ඒ මෝස්තර පහත දක්වනවා. මොරිස් මයිනර් රථය විශේෂයෙන්ම පාවිච්චි කළේ රියදුරන් පුහුණු කිරීමට සහ කුළී ගමන් යාමට. 

  මේ ඉහත දක්වා තිබෙන මොරිස් මයිනර් 1000 රථයේ විශේෂත්වයක් තියනවා. ඒ තමයි එහි පෙනෙන අර කහ පාට පටි වැනි කොටස් සම්පූර්ණයෙන්ම ලීයෙන් සකසා තිබීම. මේ රථය, මුල් කාලයේදී, තේ වතුවල අධිකාරි වරුන් විසින් පාවිච්චි කරනු ලැබුවා.

  ඒ කාලයේ වාහන පැදවීමේදී බොහෝවිට පාවිච්චි කලේ හස්ත සංඥා බව ඔබ දන්නවා ඇති. නමුත් ඒ කාලයේ සමහර වාහන වල අපූරු ක්‍රමයකට වමට හැරවීම සහ දකුණට හැරවීම පෙන්වන ගැජට්ටුවක් තිබුණා. එය ක්‍රියා කරවුයේ රථයේ සුක්කානම අසළ සවිකර තිබු ණු යාන්ත්‍රික ස්විචයකින්. ඒ ස්විච් එක දැන් වාහනවල තිබෙන වයිපර් ස්විච් එක වගේ. මේ පහත දක්වන්නේ ඒ සංඥා උපකරණයයි. මෙයට කිව්වේ signal hand කියලා. මෙහි ඇතුලේ කුඩා විදුලි බුබුලක්ද දැල්වුනා. 

  

  මොරිස් සමාගමේ වාහන තව බොහොමයක් තියනවා. ඒ සමාගම ගැන විතරක් කතාකරන්න එක ලිපියක් මදිවෙයි. ඒ නිසා කෙටියෙන් කරුණු දක්වනවා. මොරිස් ඔක්ස්ෆර්ඩ් නමින් හැඳින්වෙන වාහන මෝස්‌තර අවම වශයෙන් දෙකක් මට මතකයි. මේ මුලින්ම දක්වන මොරිස් ඔක්ස්ෆර්ඩ් රථය එතරම් ජනප්‍රිය වුණේ නැහැ. 

  නමුත් මොරිස් ඔක්ස්ෆර්ඩ් රථයේ මෙන්න මේ මෝස්තරය අතිශයින් ජනප්‍රියයි. මා අසා තිබෙනවා මේ මෝස්තරය යාපනය ප්‍රදේශයේ විශේෂයෙන් ජනප්‍රියයි කියා. එමෙන්ම මා දැක තිබනවා යාපනය නගරයේ මේ වර්ගයේ රථ සෑහෙන සංඛ්‍යාවක්. 

  

  මොරිස් සමාගමට අනුබද්ධිතව 1924 දී ඇරඹුණු එම්.ජී. සමාගම විසින් ආසන දෙකේ වේගවත් වාහන නිපදවීම ඇරඹුනා. MG යන අකුරු දෙකෙන් කියවුනේ, Morris Garages යන්නයි. මෙම MG වාහන ලොව පුරා අතිශයින් ජනප්‍රිය වුණා. එහි මෝස්‌තර දෙකක් පමණක් පෙන්වන්නම්. මුලින්ම තිබෙන්නේ MG ලාංඡනය එදා සහ අද දැක්වෙන ආකාරයයි.

  

  මේ ඉහත දක්වා ඇති කොළපාට MG රථය සුදු, රතු, වැනි පාට වලින්ද තිබුණා. ඒ කාලේ මේ කාරයක අයිතිකරුවකු වීම අද හමර් රථයක් හිමිකරුවකු වීම වගෙයි.

  මොරිස් කාර් ගැන තවත් දිග විස්තර ලියන්න හැකිවුණත් මා හිතනවා ඉක්මනින්ම තවත් වාහන වර්ගයක් කරා යාම සුදුසුයි කියා. මීළඟට මා ඔබව රැගෙන යන්නේ ඔස්ටින් වර්ගයේ වාහන වෙතයි. මොරිස් වාහන තරම්ම ලංකාවේ පනමක් නොව ලෝකයේම ජනප්‍රියවූ වාහන පෙළක් ඔස්ටින් සමාගමෙන් නිපදවුනා. ඔස්ටින් සමාගමේ ඉතිහාසය 1905 තරම් ඈත අතීතයට දිවටනවා. මා මෙහිදී ඔබවෙත පෙන්වන්නේ ලංකාවේදී බහුලව දකින්නට ලැබුණු මෝස්‌තර කීපයක් පමණයි. ඒ ඒ කාර් මෝස්තරය අදාළ පින්තූරයේම සඳහන් කර තිබෙනවා. මුලින්ම තිබෙන්නේ ඔස්ටින් ලාංඡනය, විවිධ කාල වකවානු වලදී වෙනස්වී ඇති ආකාරයයි. 

  

  ඔස්ටින් කාර් අතරින් බොහොම ජනප්‍රිය, මහේශාඛ්‍ය කාර් එකක් වුණේ ඔස්ටින් ඒ 55 කේම්බ්‍රිජ් රථයයි. මට මතකයි මගේ ලොකු අක්කා 1968 වසරේදී මනමාලියකවී ගමන්ගත්තේ මේ රථයකින් බව. ඒ කාලයේ, මට මතක හැටියට, 'පුංචි බබා' චිත්‍රපටියේ හෝ වෙනත් චිත්‍රපටියක, මේ වර්ගයේ රථයක්, මංගල රථය ලෙස යොදාගත් ජවනිකාවක් තිබුණා. එහිදී, එක පින්තූරයක් තිබෙනවා, රථයේ පසුපස වම් පැත්තේ දොර වීදුරුවෙන්, මංගල යුවල පෙනෙන ආකාරය දැක්වෙන ලෙස ගත් එකක්. මම හිතන්නේ, ඒ පින්තූරයේ ඉන්නේ, ජෝ අබේවික්‍රම සහ මාලනී ෆොන්සේකා. ඒ පින්තූරය බොහෝවිට, අපේ ජ්‍යොෂ්ඨ සිනමා නළු, ටෝනි රණසිංහගේ සොයුරු රැලෙක්ස් රණසිංහ විසින් ගත් එකක් බවයි මතක. කෙසේ හෝ ඒ කාලයේ සෑම විවාහ මංගල්‍යයකදීම මේ ආකාරයට පින්තූරයක් ගත්තා. මගේ ලොකු අක්කාගේ විවාහ මංගල ඡායාරූප අතරත් එවැන්නක් තියනවා. ඉහත දැක්වෙන මොරිස් ඔක්ස්ෆර්ඩ් රථයත්, මේ පහත දැක්වෙන ඔස්ටින් කේම්බ්‍රිජ් රථයත් සංසන්දනය කර බලන්න. 

  

  ඉහත දක්වා ඇති බොහොමයක් කාර් මෝස්‌තර වල Mark I, Mark II, ආදී වශයෙන් තවත් මෝස්‌තර තිබුණත්, ඒ සියල්ල මෙහි දක්වන්නේ නැත්තේ, ලිපිය ඉතා දීර්ඝ එකක් වීම වලක්වා ගන්නටයි. මගේ පරමාර්ථය, මේවා ඔබට පෙන්වාදීම සහ සමහර අයගේ මතකය අලුත් කිරීමයි. ඊළඟ කොටසේදී තවත් මෝටර් රථ වර්ග ගැන කතා කරමු.

2014 අප්‍රේල් මස 15 දින 2341 පැය

වදන් බලය ඉංග්‍රීසියෙන් - Word Power in English

        මීට පෙර මා, අවස්ථා කීපයකදී, ඔබට, පැරණි 'සිව්දෙස' සඟරා ආශ්‍රයෙන්, 'වදන් බලය' නමැති මාතෘකාවෙන්, ලිපි කීපයක් ඉදිරිපත් කල බව, ඔබට මතක ඇති. අද මා සිතුවා, පැරණි 'රීඩර්ස් ඩයිජස්ට්' සඟරාවක් ඇසුරෙන්, ඔබේ ඉංග්‍රීසි වදන් බලය මැනෙන අභ්‍යාසයක්, ඉදිරිපත් කරන්නට. මා හිතනවා, ඔබෙන් සෑහෙන දෙනෙකු මේ අභ්‍යාසයේ යෙදෙයි කියා. පිළිතුරු සහ, ලබාදුන් නිවැරැදි පිළිතුරු ගණන අනුව ලැබෙන වර්ගීකරණයද, පහත දක්වා තිබෙනවා. නමුත් මා ඔබෙන් ඉල්ලා සිටින්නේ, අදම පිළිතුරු නොබලා, දින කීපයක් ගතකර හෝ, මනසින්ම, මේ අභ්‍යාසයේ යෙදෙන ලෙසයි. මෙහි වචන 20 ක් ඇති අතර, ඒ සෑම වචනයකම තේරුම සොයාගැනීමට, වරණයන් හතරක් ද ලබාදී තිබෙනවා. මෙය උපුටාගත්තේ, 1984 පෙබරවාරි මාසයේ 'රීඩර්ස් ඩයිජස්ට්' සඟරාවෙන්. මෙහි තවත් විශේෂත්වයක් තිබෙනවා. මේ අභ්‍යාසය සඳහා යොදාගෙන තිබෙන වචන, 'අභ්‍යවකාශය සහ අභ්‍යවකාශ යානා' යන විෂයය හා සම්බන්ධ කරගෙනයි සකසා තිබෙන්නේ. 

හොඳයි එහෙනම් මෙන්න අභ්‍යාසය 

පහත දැක්වෙන පිළිතුරු පසුව බලන්න 

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

↓

     2014 අප්‍රේල් මස 09 දින 0002 පැය

මගේ පුස්තකාලයෙන් A Glimpse from My Library

 මගේ පුස්තකාලයෙන් අද මා හඳුන්වා දෙන පොත, ඉතාම විශේෂිත පොතක් වෙනවා. ඒ තමයි, මා දන්නා තරමින්, ශ්‍රී ලංකා යුදහමුදා ඉතිහාසයේ ප්‍රථම වරට, සේවයේ යෙදී සිටින හමුදා සාමාජිකයකු විසින් ඉදිරිපත් කරනු ලබන, (වාර්තාමය/ප්‍රබන්ධ යන දෙආකාරයම මිශ්‍රවූ) පළමුවැනි ග්‍රන්ථය මෙය වීම. සාමාන්‍යයෙන් ලෝකයේ බොහෝ රටවල ත්‍රිවිධ හමුදා සාමාජිකයන්, තම සංග්‍රාමික අත්දැකීම අළලා ග්‍රන්ථකරණයේ යෙදීම, එතරම් අරුමයක් නොවෙයි. මා ළඟත් එවැනි ග්‍රන්ථ කීපයක් තිබෙනවා. එවැනි ග්‍රන්ථ රාශියක තොරතුරු එකතුවක් ඔබට මෙතනින් බලන්න පුළුවන්. එහිදී, තමන්ගේම හමුදා ක්‍රියාකාරකම් විවේචනය කරමින් අදහස් දැක්වූ නිර්මාණ ද තිබෙනවා. නමුත් එලෙස නිර්භයව අදහස් දැක්වීමට, (නිකම් හිතළු කතා නොව සාධක සහිතව ඔප්පු කළහැකි දෑ) අප රට තුළ, විශ්‍රාමික හමුදා සාමාජිකයකුටවත් පූර්ණ නිදහසක් ඇතැයි මා සිතන්නේ නැහැ. මේ ග්‍රන්ථයේදී ද, කතුවරයා, ඉතා වැදගත් සිදුවීම් විස්තර කළත්, ඒ සිදුවීම් වලට සම්බන්ධ හමුදා නිලධාරීන්ගේ නම් සඳහන් කර නැත්තේ, කිසියම් නෛතිකමය හේතු නිසාදැයි කියා මට සිතෙනවා.

  අපේ රටේ ත්‍රිවිධ හමුදාවේ දැනට සේවයේ යෙදී සිටින සාමාජිකයකුට, මෙවැනි නිර්මාණයක් හෝ යටත්පිරිසෙයින් මේ රටේ පලවන දිනපතා පුවත්පතකට සාහිත්‍යමය නිර්මාණයක් කරන්නට පවා (හමුදාව ඇතුළත පළවන සඟරා හා ප්‍රකාශන හැර) අවම වශයෙන් හමුදා මූලස්ථානයේ අවසරයවත් (බොහෝවිට ආරක්ෂක අමාත්‍යංශයේ අවසරය) අවශ්‍යයි. මේ ග්‍රන්ථය සඳහාත් එවැනි අවසරයක් ගන්නට ඇතැයි මා හිතනවා.

  සිංහල බ්ලොග් අවකාශයේ, හමුදා තොරතුරු ගැන ලියවෙන වෙනත් අඩවියක්, මා දන්නා තරමින් නැති නිසා, මේ පොත මගේ අඩවියෙන් හඳුන්වාදීම ද, විශේෂත්වයක් වන අතර, මේ පොත ලියා තිබෙන්නේ, මා පෞද්ගලිකව හොඳින් දන්නා හඳුනන, එමෙන්ම මා අයත්ව සිටි, ශ්‍රී ලංකා සිංහ රෙජිමේන්තුවේ, වර්තමාන රෙජිමේන්තු අධිපති වරයා වීමත් තවත් විශේෂත්වයක්. මතකයි නේද මේ ඊයේ පෙරේදා මම මහගෙදර ගියා. එදා තමයි මේ පොත ගත්තේ. 

  

  මේ පොත ගැන ඔබට සිතෙන දේ, මගෙන් නොඅසා, කතුවරයාගෙන්ම අසා දැනගන්නට හැකිවනු ඇතැයි මා සිතනවා. එයට හේතුව වන්නේ, කතුවරයා සිය දුරකථන අංක මෙන්ම, ඊ මේල් ලිපිනයද, මේ පොතෙහිම, සඳහන් කර තිබීමයි.

   පසුගිය දශක තුනක පමණ කාලය තුළ, කතුවරයා, උතුරු නැගෙනහිර සංග්‍රාම භූමි වලදී, පෞද්ගලිකවම ලද අත්දැකීම් සහ, ඔහුගේ විෂයය පථයට අදාළව අත්විඳි තවත් තොරතුරු අතරට, අපූරු වෘතාන්තයක් ද කැටිකර තිබීම, මේ පොතේ අගය ඉහළ දමන බව මා හට පෙනීගියා. ඒ නිසාමයි මේ පොත ඔබ සමග මෙසේ බෙදා හදා ගන්නට සිතුවේ.

   සංග්‍රාමාවසානයේ ලද ඉසිඹුව, ග්‍රන්ථ කරණය කෙරෙහි යෙදවීමෙන්, කතුවරයා හුදු යුද වාර්තා කරුවකු නොවී, සාහිත්‍ය නිර්මාපකයකු වීම අතිශයින් වැදගත් වනවා. මා එසේ කියන්නේ, මේ නිර්මාණය, ශ්‍රී ලංකා ත්‍රිවිධ හමුදාවේ, තවත් මෙවැනි නිර්මාණ කුසලතාව ඇති අයවළුන්ගේ, චිත්ත සන්තානයෙහි යම් කම්පනයක් ඇතිකිරීමට සමත් වුණොත්, තවත් මෙවන් අගනා නිර්මාණ රැසක් බිහිවීමට, විශාල ප්‍රවනතාවක් ඇතිබව පැහැදිළිවම පෙනීයන නිසයි.

    මගේ චූර්ණිකාව මෙතෙකින් අවසන් කොට ඔබව මේ පොතේ පිටු අතරට ගෙනයන්නයේ මේ සූදානම් වෙන්නේ. 

මා හිතනවා, ඉහත විස්තර කියවීමෙන්, ඔබ යම් පුළුල් අදහස් ගොන්නක් අවබෝධ කරගන්නට ඇතැයි කියා. මෙතැන් සිට අපි මේ පොතේ අභ්‍යන්තරයට පිවිසෙමු.

  අලිමංකඩ කඳවුර සතුරන්ගෙන් බේරා ගැනීම සඳහා මුහුදෙන් භටපිරිස් ගෙනැවිත්, වෙත්තලකර්නි වෙරළ තීරයේ ගොඩබැස, කළ මහ සටන සහ තවත් මහා ක්‍රියාන්විත රැසක තොරතුරු, මේ පොතේ ඇතුළත් වෙනවා.

සංග්‍රාමය විතරක් නෙවෙයි, ලස්සන ප්‍රේම වෘතාන්තයකුත් මේ පිටු අතරෙම දිවයනවා.

යුද්ධය කෙබඳුද යන්න විස්තර කෙරෙන අවස්ථා මෙන්ම යුද්ධය දෙස අප බැලිය යුතු දෘෂ්ටි කෝණය පැහැදිළි කෙරෙන අවස්ථාද මේ පොතේ ඇතුළත් වෙනවා.

මේ ලස්සන වාර්තාමය වෘතාන්තය කියවීමට මා ඔබට කාරුණිකව ඇරයුම් කරනවා. ඔබේ අදහස් දැනගැනීමට කතුවරයා වගේම මමත් බොහොම කැමැත්තෙන් ඉන්නවා.

     2014 අප්‍රේල් මස 02 දින 0010 පැය